“Txus Martinen osasuna eta bizitzarekin jolasten ari” direla salatu dute Justizia Jauregian

Basauriko Herri Bilguneak elkarretaratzea burutu du gaur eguerdian Bilboko Justizia Jauregiaren aurrean Txus Martin Basauriko presoaren “egoera larria” salatzeko eta bere askatasuna aldarrikatzeko.

30 pertsona inguru bildu dira eguerdiko 12:00etan Justizia Jauregiaren aurrean, Txus Martinen askatasuna eskatzeko. Egitasmoa Basauriko Herri Bilguneak antolatu du eta bertan gogorarazi dutenez, Martinek 10 urte daramatza espetxean eta “egoera larriena duen euskal preso politikoa da”.
Basauriko presoak nahasmen eskizo-afektiboa duela eta azken aldian bere “osasun egoerak okerrera egin duela” azaldu dute, “espetxearen erantzun bakarra medikazioaren dosia aldatzea izan delarik, diagnostiko zehatzik egin gabe”. Era berean, “eskanerrik egin ez diotela eta bisitetara orientazioa galduta doala” jakitera eman dute eta ondorioz, “ia egun osoan zehar sedatuta mantentzen” dutela. Suizidioaren kontrako protokoloa aplikatu badiote ere, “konfidantzako medikuari eta psikologoari ez dietela Txus artatzen utzi” salatu dute.
Egoera horren aurrean, martxoaren 24an plaza Eliptikoan 12:30etatik aurrera, Txusen askatasuna eskatzeko burutuko den 24 orduko mobilizazioan parte hartzera deitu dute jendartea eta era berean, hilaren 25ean plaza beretik, 12:30etan abiatuko den martxan ere.info+: bilbokobranka.info

Bideoa: Herrirak elkarretaratzea egin du Bilboko Justizia Jauregiaren parean Txus Martinen askatasuna galdegiteko